Ի՞նչ է կուտակային կենսաթոշակային համակարգը և ո՞ւր են գնում մեր փողերը

Ի՞նչ է կուտակային կենսաթոշակային համակարգը

Կուտակային կենսաթոշակային համակարգի էությունը հետևյալն է. Ձեր աշխատավարձից մի մաս հանվում է՝ որպես կենսաթոշակային վճար, և փոխանցվում ձեր կենսաթոշակային հաշվին, և ստացվում է, որ դուք, աշխատելով հիմա, կուտակում եք ձեր ապագա կենսաթոշակը:

Բացի այդ, քանի որ ունենում եք հաշիվ կենսաթոշակային ֆոնդում, դառնում եք ֆոնդի փայատեր, և կախված այն բանից, թե որ ֆոնդում կկատարեք ձեր ներդրումները, կարող եք ունենալ օրինակ բաժնետոմսեր կամ պարտատոմսեր ինչպես ՀՀ-ում, այնպես էլ արտերկրում:

Որքա՞ն գումար է ամսական փոխանցվում այդ հաշվին

Կենսաթոշակային հաշվին փոխանցվում է ամսական աշխատավարձի 10%-ը, որից 5%-ը հանվում է ձեր աշխատավարձից, մյուս 5-ը՝ ձեր հաշվին փոխանցում է պետությունը՝ պետական բյուջեից:

Ինչու՞ 10%

Սա մաթեմատիկական հաշվարկ է՝ ուղղված նրան, որ կենսաթոշակի չափը լինի ձեր վերջին աշխատավարձի առնվազն կեսի չափով:

Իսկ եթե չե՞ք աշխատել

Անկախ ձեր կուտակածից՝ նախատեսված է կենսաթոշակի բազային չափ՝ 25.500 ՀՀ դրամ:

Ո՞վ է կառավարում կենսաթոշակային հաշիվը

Կարիք չկա անհանգստանալու ձեր կենսաթոշակային միջոցների համար այնքանով, որ կենսաթոշակային հաշիվը կառավարվում է պրոֆեսիոնալ կենսաթոշակային կառավարիչների՝ «Ամունդի-Ակբա Ասեթ Մենեջմենթ» ՓԲԸ-ի և «Ցե-Կվադրատ Ամպեգա Ասեթ Մենեջմենթ Արմենիա» ՍՊԸ-ի կողմից: Կառավարիչներից յուրաքանչյուրը վարում է 3 ներդրումային ֆոնդ:

Որո՞նք են այդ ներդրումային ֆոնդերը

Ձեր աշխատավարձի մասհանումները ներդրվում են կենսաթոշակային ֆոնդում: Դուք կարող եք ընտրել, թե որ ֆոնդ փոխանցվեն ձեր ներդրումները:

Ֆոնդի տեսակները երեքն են՝ կայուն եկամտային, պահպանողական և հավասարակշռված:  

Ո՞րն է ֆոնդերի միջև տարբերությունը, և ինչպե՞ս կատարել ճիշտ ընտրություն

Կայուն եկամտային ֆոնդի դեպքում ներդրումները կատարվում են միայն պարտատոմսերում, բանկային ավանդներում: Սա նախատեսված է այն մարդկանց համար, ովքեր չեն ուզում ռիսկի դիմել և ապահովում է կենսաթոշակային միջոցների պահպանումն ու չափավոր աճը:

Պահպանողական ֆոնդի դեպքում մինչև 25 տոկոսը ներդրվում է բաժնետոմսերում, իսկ մնացածը՝ պարտատոմսերում:

Հավասարակշռված ֆոնդի դեպքում ֆոնդի ակտիվների մինչև 50 տոկոսը ներդրվում է բաժնետոմսերում, մյուս 50 տոկոսը՝ պարտատոմսերում: Նախատեսված է բարձր ռիսկայնություն նախընտրող մարդկանց համար և ապահովում է կենսաթոշակային միջոցների առավելագույն աճ:

Դուք կարող եք ընտրել ինչպես ֆոնդի տեսակը, այնպես էլ ֆոնդի կառավարչին:

Երիտասարդներին խորհուրդ է տրվում ընտրել հավասարակշռված ֆոնդը, միջին տարիքի մարդկանց՝պահպանողական ֆոնդը, իսկ թոշակի շեմին գտնվող անձանց՝ կայուն եկամտայինը:

Ինչպե՞ս կատարել ընտրությունը:

Ֆոնդի ընտրությունը կարելի է կատարել առցանց` www.epension.am կայքի ԻՄ ՀԱՇԻՎԸ համակարգի միջոցով` եթե ունեք նույնականացման քարտ և քարտը կարդացող սարք, կամ հաշվի օպերատորների միջոցով:

Ինչպե՞ս եք հետ ստանալու ձեր կուտակածը:

Միանվագ: Այս դեպքում ձեր կուտակումներն ամբողջությամբ և միանվագ վճարվում են ձեզ: 

Անուիտետի ձեւով: Երբ ձեր կուտակումները փոխանցվում են ապահովագրական ընկերությանը, որը ձեզ ցմահ վճարում է թոշակ:

Ծրագրային վճար: Այս դեպքում ձեր կուտակումները կառավարիչը ձեզ վճարվում է կյանքի սպասվող միջին տևողության ամբողջ ընթացքում (այն հիմա 17 տարի է):