Ի՞նչ անել, եթե ձեզ հրապարակայնորեն վիրավորել կամ զրպարտել են

«Դու ինձ վիրավորեցիր», «դա վիրավորական էր»․ հաճախ կարող ենք լսել նմանատիպ արտահայտություններ ու երբեմն էլ վիրավորողը հենց մենք ենք։ Այստեղ հարց է առաջանում՝ արդյոք հնարավո՞ր է անձին պատասխանատվության ենթարկել վիրավորանքի համար: Դրական պատասխանելով հարցին՝ պետք է նշել, որ անձի պատիվը, արժանապատվությունը կամ գործարար համբավը գտնվում են ՀՀ քաղաքացիական օրենսգրքի պաշտպանության ներքո: Այսինքն՝ անձը կարող է իրականացնել իր պատվի, արժանապատվության իրավունքի պաշտպանությունը քաղաքացիական օրենսգրքով սահմանված կարգով: Դեռ ավելին, ՀՀ քաղաքաացիական օրենսգիրքը նախատեսում է նշված իրավունքների պաշտպանության հնարավորություն նաև անձի մահից հետո:

Եթե դուք կարծում եք, որ Ձեզ վիրավորել են, կարող եք դիմել դատարան։Սակայն մինչև դիմելը անհրաժեշտ է պարզել հետևյալ հանգամանքները:

1. Արտահայտությունը պետք է կատարված լինի հրապարակայնորեն: Հրապարակային է համարվում ցանկացած 3-րդ անձի ներկայությամբ արված արտահայտությունը:

2. Հաջորդ կարևոր քայլը պարզելն է՝ արդյոք արված արտահայությունը վիրավորա՞նք է, թե՞ զրպարտությունը, քանի որ օրենսգիրքը տարբեր կարգավորումներ է նախատեսում նշված երկու հասկացությունների համար:

Վիրավորանքը անձի սուբյեկտիվ գնահատականն է մեկ այլ անձի մասին (օրինակ՝ Ա-ն տհաս է)։ Ինչ վերաբերում է զրպարտությանը, ապա այն որոշակի փաստական տվյալ, հայտարարություն է (օրինակ՝ Ռ-ն հարստացել է ժողովրդի հաշվին)

3. Հաջորդ կարևոր նախապայմանը հայտարարության կամ գնահատականի արատավորող բնույթն է: Այսինքն՝ դրանք պետք է այն աստիճան բացասակաան իմաստ պարունակեն, որ հնարավոր լինի փաստել անձի պատվին, արժանապատվությանը կամ գործարար համբավին պատճառված վնասի մասին:

ՀՀ քաղաքացիական օրենսգիրքը սահմանում է, որ վիրավորանքի դեպքում տուժող կողմը կարող է պահանջել հետևյալը.

1. հրապարակայնորեն ներողություն խնդրել

2. եթե վիրավորանքը հասցվել է լրատվական գործունեություն իրականացնողի տարածած տեղեկատվության միջոցով, ապա նույն լրատվական գործունեություն իրականացնողի կողմից պետք է հրապարակվի դատարանի վճիռը ամբողջովին կամ մասնակիորեն:

3. պահանջել փոխհատուցում՝ նվազագույն աշխատավարձի 1000-պատիկի չափով (1.000.000 դրամ):

Զրպարտության դեպքում անձը կարող է ներկայացնել հետևյալ պահանջները:

1. եթե զրպարտությունը տեղ է գտել լրատվական գործունեություն իրականացնողի տարածած տեղեկատվության մեջ ապա անձը կարող է պահանջել որ նույն լրատվականը հրապարակայնորեն տարածի հերքում կամ իր պատասխանը

2. փոխհատուցում՝ նվազագույն աշխատավարձի 2000-պատիկի չափով (2.000.000 դրամ):

Ընդ որում, թե՛ վիրավորանքի և թե՛ զրպարտության դեպքում անձն ազատ է որոշելու, թե ինչպիսի պահանջ(ներ) ներկայացնի: