Ներդնե՞լ ավանդ, թե ոչ․ այս է խնդիրը

Մեզնից շատերը ցանկանում են իրենց խնայողությունները կուտակել բանկում որպես ավանդ, սակայն ներդրում չեն կատարում՝ վախենալով կորցնել ունեցածը:

Պարզաբանենք, թե որն է բանկային ավանդը, ինպես խուսափել հնարավոր ռիսկերից և կուտակել տոկոսներ:

Բանկային ավանդն անձի կողմից բանկին տրամադրված այն գումարն է, որը ավանդատուն հետագայում հետ է ստանում լրացուցիչ տոկոսադրույքների հետ միասին:

Շատերի մոտ բանկերի նկատմամբ վստահությունը այնքան էլ բարձր չէ, այդ իսկ պատճառով գերադասում են գումարը պահել բարձի տակ, քան որպես ավանդ ներդնել բանկում: Հարկ է նշել, որ Հայաստանի Հանրապետությունում գործում է ավանդների երաշխավորման համակարգը, որի նպատակը բանկերի սնանկացման դեպքում ավանադատուների ներդրած գումարի վերադարձն է: Սակայն կա 2 պայման․

• Ավանդատուն պետք է լինի ֆիզիկական անձ,
• Նրա կողմից ներդրված գումարը չգերազանցի 10 մլն ՀՀ դրամը:

Ավանդների երաշխավորման համակարգը պատրաստ է բանկերի սնանկացման դեպքում բոլոր ֆիզիկական անձանց հետ վերադարձնել իրենց կողմից ներդրված գումարները, եթե դրանք չեն գերազանցում 10մլն ՀՀ դրամը: Հետևաբար՝ վախենալ պետք չէ, պարզապես կարող ենք մեր գումարը 10-ական մլն դրամներով բաշխել տարբեր բանկերում՝ դրանով իսկ մեզ ապահովելով որևէ ռիսկից: Ինչպես ասում են՝ «Բոլոր հավկիթները նույն զամբյուղում մի´ դիր»:

Ավանդները լինում են 2 տեսակի` ցպահանջ և ժամկետային:

Ցպահանջ ավանդի դեպքում եթե ցանկանում եք մինչ ավանդի պայմանագրի ժամկետը լրանալը հետ վերցնել ներդրված գումարը, բանկը պարտավորվում է ամբողջությամբ վերադարձնել այն, ինչպես նաև ավանդի դիմաց ստացված տոկոսագումարները:

Ժամկետային ավանդների դեպքում ավանդի պայմանագիրը կնքվում է ավանդը որոշակի ժամկետի ավարտից հետո վերադարձնելու պայմանով:

Ժամկետային ավանդի դեպքում մենք նույնպես կարող ենք ետ վերցնել մեր ավանդը մինչ ավանդային պայմանագրի ժամկետը լրանալը և բանկը պարտավորվում է մեզ վերադարձնել մեր ներդրած գումարը ամբողջությամբ: Սակայն տվյալ դեպքում հնարավոր է, որ բանկը մեզ հատկացնի պայմանագրի կնքման պահին մեզ խոստացված տոկոսագումարների մի մասը կամ ընդհանրապես չվճարի տոկոսագումարներ:

Ելնելով ժամկետային ավանդի այս առանձնահատկությունից, սովորաբար, ժամկետային ավանդի համար սահմանված տոկոսադրույքը ավելի բարձր է լինում (8%, 10%, 12% և այլն), քան ցպահանջ ավանդի դեպքում (0.1%, 0.5%, 1% և այլն):

Եթե ցանկանում եք ավանդ ներդնել բանկում, սակայն դեռ վստահ չեք կամ հարցեր ունեք, ապա կարող եք դիմել մեզ՝ ստանալու անվճար խորհրդատվություն։